السلام عليكم
نصيحة من طالبة صيدلة ...
اتمنى تقروها
رسالتي موجهه لطلاب السادس سواء علمي او ادبي ولكل شخص عنده احد بعائلته هو سادس... مضل شي تقريبا شهر و تخلصون الامتحانات وتعطلون
تخيلوا شهر واحد يتحكم بكل حياتكم بمستقبلكم وبكلشي يعني هو شهر اقفل التليفون وانطي لاهلي وحتى اذا جنت مشاد حيلي الفتره الي مضت اكول خلص لهنا و انتهى اكعد من ال6 الصبح ادك قرايه لليل و انام بس 8 ساعات و باقي الوقت بس قرايه و اكل لا تلفزيون لا تليفون لا سوالف ملها داعي يعني هو شهر اضغط بي على روحي و بعدها اعيش براحه بالنسبه للبنات يعني انتي شهادتج سلاحج اولا رح تضمنين بالمستقبل محد اله فضل عليج لان الاهل الله يطول بعمرهم مدايمين الج و الاخ والاخت كل واحد حيحير بروحه وحتى من تتزوجين رح تصيرين عاله على زوجج حاولي بيج مابيج تقرين وتجيبين معدل عالي يعني خاصه اذا رحتي شي مجموعه طبيه تضمنين تعين و رح تعيشين ملكه اولا ثانيا رح تصير قسمتج بمكان زين والف واحد يتمناج لان طمعاً بيج اني مره اجتني قسمه وحرت اوافق لو لا فخابرت صديقتي كلتلها اخاف طمعان بيه لان اني صيدلانيه كالت مفروض تفرحين ع الاقل ميكول بداخله هاي عاله عليه وتعال اصرف عليها... حيكول هاي تشيل روحها يعنيتكونين مصدر راحه مو تعب اله ولاهلج تخيلي انو هذا الشهر يتحكم بمصيرج وزواجج واطفالج وكلشي هو شهر اضغط على روحي ومن الصبح لليل اقرا لحد ما اجيب درجه عاليهاما الشباب يعني انت هسه دتقرا وتكول بس اريد انجح وانتهى.. لا حبيبي انت مفروض تجيب معدل تروح قسم بي خير يعني باجر عكبه من تحب بنت وتريد تتقدملها وين من تروح وانت دكتور لو صيدلاني لو مهندس لو محامي... ووين من تروح وانت معدك شهاده او قسم تعبان
اني من الناس اهلي مينطوني لشخص بلا شهاده... مع احترامي للي مكدروا يحصلون شهاده عاليه و اكيد كلمن اله ضروفه بس انت لسه مفات الوقت عليك حاول بيك ما بيك تقرا من الصبح لليل وحتى لنفرض مجبت معدل عالاقل تكول اني سويت الي عليه كدام ربي واهلي و نفسي اني ماقصرت وشميطلع معدل هو هذا بعد رب العالمين رح يكتبلك الخير بينصيحه اخرى ولو طولت عليكم لما تقرا و تمل او تنعس روح غسل وجك بمي بارد و صابون و نشف زين و اقرا سوره الكرسي استغفر واشرب كلاص مي وارجع اقرا كول الي جابوا معدل عالي مو احسن مني
وبحاله الي شفتوا الجواب مالتكم مو تمام بالامتحان هاي الي يريد معدل وقرر يمسح الدفتر ويطلع اكو نصيحتين الاولى امسح كلشي لان اكو حاله انو مسحوا كم شي كالوا قابل حننجح لهالكم سؤال الخطا وتالي المصحح مساعدهم وطلعلهم 50 وكسرت المعدل
والنصيحة الثانيه انو بحاله التاجيل لا تاجل ماده على ماده لان بالدور 2 تصير يوم على يوم يعني محتجاوبون ف اذا تاجلون ماده.. الماده البعدها لا تاجلوها حتى بالدور 2 لا الوقت يضايقكماني ادري طولت عليكم بس هسه لو نصيحتي هاي تاثر بطالب واحد او طالبه وحده رح احس سويت انجاز
فدوه عوفوا الانستا والفيس و الحب و الضوجه وكلمه ماكو واهس وووو وبس ركزوا بشي اسمه هاي حياتي وهاي مستقبلي هو شهر واحد وحقكم تضوجون وتكولون شلون نجيب طبيه يرادلها معدل 98 وصعبة لا مو صعبه انتو كدها و قبلكم كومه طلاب جابوها زمان جان الي يجيب 90 يروح طبيه هسه 98 يلا يحصلها السبب انو كليات جانت بذاك الوقت هم مستنصريه بغداد يرموك نهرين كندي وجان عدد سكان العراق 15 مليون تقريبا.... حاليا عدد السكان 45 مليون يعني تضاعف العدد 3 مرات و بعدها عدد الكليات هي هي فطبعا المنافسه تزيد بس انتو لازم تسوون العليكم والباقي على الله
وان شاءالله كل التوفيق للجميع والنجاح الباهر لكل الطلاب ♥
